Hogaamiye Al-Shabaab Oo Cudurka Kansar-ka Ku Dhacay.

Sida uu daabacay Wargeyska The Star ee kasoo baxaya dalka Kenya waxaa laga deyrinayaa Xaaladda hoggaamiyaha Maleeshiyaadka Al-Shabaab Axmed Cumar ee loo yaqaan Abu Ubeiydah.

Wargeyska ayaa sheegay in hogaamiyaha uu ku dhacay cudurka Kansarka Caloosha gala, islamarkaasna ay adag tahay inuu kasoo reysto, maadaama uusan joogin meel laga heli karo xarumo Caafimaad oo cudurkaan wax looga qaban karo.

Sidoo kale Wargeyska ayaa sheegay in hogaamiyaha uu sariir saaran yahay,islamarkaana uusan awoodin in uu kasoo kaco,madaama uu ku dhacay kansarka Caloosha.

Hogaamiyayaasha kale ee Shabaab ayuu wargeyska sheegay in ay aaminsan yihiin in aysan macquul aheyn in Abu Ubeiydah sii ahaado hogaamiyaha Maleeshiyaadka Shabaab.

Waxaa haatan jira loolan adag oo u dhaxeeya hogaamiyayaasha,oo haatan ku tartamaya jagadda hoggaamiyaha Maleeshiyaadka Al-Shabaab Axmed Cumar Abu Ubeiydah.

Horaan waxaa la shaaciyay in hoggaamiyaha Maleeshiyaadka Al-Shabaab Abu Ubeiydah in ay fariisteen labo kamid ah kilyihiisa.

Ilo-wareedyada ayaa sheegaya in Abu Cubeydah uu xanuunsanaa lixdii bilood ee ugu dambeysay, balse kooxda ay aad ugu dadaaleyso inay muujiyaan inuu wax dhibaato ah qabin,waxaase la ogeyn halka uu ku sugan yahan haatan.

Abuu Cubeyda ayaa hada u muuqda in uu yahay mid ka rajo dhigay in uu sii hayo Xilka ugu sareeya Al-shabaab oo uu qabtay sanadkii 2014-kii  kadib markii  duqeyn lagu dilay Hogaamiyihii ka horeeyey  ee Al-shabaab Ahmed Cabdi Godane.

Al-shabaab ayaa wali ku xoogan qeybo badan oo kamid ah Goboladda dalka Soomaaliya,waxayna dagaal ay kula jiraan Dowladda Soomaaliya iyo Amisom.